A aposta polas novas tecnoloxías e o traballo coordinado, “claves” para reactivar o turismo lucense

A Deputación de Lugo vén de ingresar na Rede de Destinos Intelixentes de España, que suma 120 membros, para dinamizar o sector tralo parón pola alerta sanitaria

Imaxe de arquivo do Consello Provincial de Turismo, un sistema de gobernanza valorado positivamente para o ingreso da Deputación de Lugo na Rede de Destinos Intelixentes. GPDL

Dende o 20 de maio, a Deputación de Lugo xa forma parte da Rede de Destinos Intelixentes, unha entidade de ámbito estatal coordinada dende a Secretaría de Estado de Turismo para promover un marco común de competitividade do sector turístico español. Xunto á candidatura da Deputación lucense, a Comisión Executiva da Rede deu luz verde á integración doutros 16 novos destinos, co que xa supera os 120 membros, entre destinos turísticos, institucións e empresas colaboradoras.

DESTINOS “MÁIS COMPETITIVOS” A TRAVÉS DA INNOVACIÓN E DAS NOVAS TECNOLOXÍAS

Segundo valorou a deputada de Promoción do Territorio e Turismo, Pilar García Porto, este ingreso será “clave para o proceso de reactivación do turismo na nosa provincia”, ademais de “repercutir positivamente na chegada de visitantes despois da crise do coronavirus”. Para iso, a Rede bota man da innovación e das novas tecnoloxías, como ferramentas para acadar destinos turísticos máis competitivos, precisou. Neste sentido, García Porto salientou que a Deputación de Lugo comparte estes criterios con outras institucións e axentes do sector, polo que a adhesión á Rede “será moi enriquecedor”, e non suporá compromiso económico para o organismo provincial. Do que se trata, en palabras da deputada, é de “facer de Lugo un destino máis atractivo, achegándolle aos visitantes outra maneira de descubrilo”.

PLATAFORMA “CRUCIAL” PARA ADIANTARSE ÁS NOVAS DEMANDAS DOS VIAXEIROS

Este enfoque cara á innovación e ás novas tecnoloxías, coordinado por expertos do Ministerio de Turismo, vai permitir que a Deputación de Lugo e o resto de membros da Rede poidan adiantarse ás novas demandas dos visitantes. Deste xeito, a Rede de Destinos Intelixentes configúrase como “unha plataforma crucial para compartir información e guías de boas práticas”, ademais de impulsar “novas ferramentas punteiras no sector”, entre outras accións coordinadas.

O CONSELLO PROVINCIAL DE TURISMO E AS NOVAS APPS, PUNTOS FORTES PARA O INGRESO DA DEPUTACIÓN DE LUGO NA REDE

Os méritos que tivo en conta a Comisión Executiva da Rede para aceptar a candidatura da Deputación de Lugo teñen que ver con aspectos técnicos e de xestión. García Porto lembrou que un dos criterios que motivou a adhesión foi a gobernanza a través do Consello Provincial de Turismo. Entre os criterios técnicos, valoráronse iniciativas como a posta en marcha das aplicacións Lugo 360° e Inventrip para dispositivos móbiles, ou a aplicación dun sistema de información turística intelixente, entre outras accións.

A PROVINCIA DE LUGO, UN DESTINO “SAUDABLE” APUNTALADO NA NATUREZA, O RURAL E A ENOGASTRONOMÍA

Estes elementos forman parte da remodelación da estratexia turística que vén desenvolvendo a Deputación de Lugo, pero sen esquecer outros aspectos referidos á experiencia do visitante. “Traballamos para reforzar Lugo como un destino fiable, de calidade e de excelencia”, explicou García Porto, que salientou “a seguridade, a tranquilidade ou a sustentabilidade” como valores da estratexia, para presentar Lugo como “un destino saudable” baseado na “natureza, o rural ou a enogastronomía”.

Deixa unha resposta

Your email address will not be published.

Nova Anterior

Segundo día consecutivo sin mortos por coronavirus en Galicia

Seguinte Nova

3,3 millóns de euros dos remanentes da Deputación destinaranse aos concellos e asociacións

Últimas noticias sobre GALERÍA

A %d blogueros les gusta esto: