O Consorcio de Turismo completou os primeiros proxectos de recuperación de esgrafiados na Ribeira Sacra

•Os traballos rehabilitaron os encintados tradicionais dunha casa en Montefurado, e crearon un novo mural inspirado nesta técnica nun edificio de Castro Caldelas

Resultado da intervención para recuperar os esgrafiados nunha vivenda en Montefurado, Quiroga, polo Consorcio de Turismo Ribeira Sacra. CTRS

 

• A conservación e posta en valor do patrimonio forman parte das tarefas do Consorcio de Turismo Ribeira Sacra. Esta entidade vén de iniciar diversas accións para recuperar os esgrafiados, un recubrimento artístico propio das fachadas desta zona. Os traballos estanse a desenvolver no marco do último convenio asinado entre o Consorcio e a Axencia Turismo de Galicia.
ENCLAVE DE ALTO VALOR PATRIMONIAL
A primeira intervención que se completou, dirixida por Carolina Sánchez, foi a recuperación dos esgrafiados na Casa do Carteiro, edificación deshabitada pero en bo estado de conservación, que se atopa no núcleo de Montefurado, en Quiroga. Segundo explicaron dende o  Consorcio, unha das fachadas amosa unha decoración con esgrafiados lenticulares, e a outra ten perpiaños finxidos e faixa baixo o abeiro. A aldea está situada nun entorno de atractivo turístico e con alto valor patrimonial, preto do Camiño de Inverno a Santiago, do río Sil e do túnel romano de Montefurado.
Vista frontal da fachada dun edificio do casco histórico de Castro Caldelas, cun mural de nova creación inspirado nos encintados.
A intervención estivo dirixida polos restauradores Carolina Sánchez e Francisco Xabier Bernárdez, e realizada polos muralistas Xoana e Miguel, da Cooperativa Cestola na Cachola. CTRS
TRADICIÓN E MODERNIDADE
Este proxecto do Consorcio de Turismo Ribeira Sacra concretouse polo de agora nunha segunda intervención, nesta ocasión nun entorno urbano e cun deseño de nova creación. Aproveitouse a fachada dun edificio do casco histórico de Castro Caldelas, nunha área na que abondan os encintados, para retomar esta técnica tradicional combinándoa co muralismo contemporáneo. Segundo Carolina Sánchez, unha das restauradoras, xunto con Francisco Xabier Bernárdez, que coordinou a intervención, empregaron unha técnica “das menos frecuentes” na Ribeira Sacra, e que se achega máis ás de outras zonas da Península Ibérica. Sánchez destacou como “moi enriquecedora” a experiencia de traballar con artistas muralistas, que permite “máis posibilidades” misturando técnicas que “a priori, parecían distantes”.
Xoana e Miguel, muralistas do colectivo Cestola na Cachola, xa traballaron en anteriores murais na Ribeira Sacra. Xoana destacou o esgrafiado como “unha técnica estupenda” para traballar en todo tipo de muros. O deseño de Castro Caldelas resultou “moi adaptado á contorna”, misturando elementos da natureza, como follas, árbores ou estrelas, con motivos etnográficos, como a Festa dos Fachos, un hórreo ou a efixie das mulleres labregas.•
Detalle do mural lateral deste mesmo edificio, que representa a dúas mulleres traballadoras do campo. CTRS

 

 

 

 

 

 

 

 

 

 

 

 

 

 

 

 

 

 

Deja un comentario

Your email address will not be published.

*