•40 EXPOSITORES EN MONFORTE NO “SHOWROOM BODAS Y EVENTOS”, OS DÍAS 2 E 3 DE DECEMBRO

• R.-MONFORTE.
Os vindeiros días 2 e 3 de decembro, terá lugar en Monforte o ShowRoom Bodas y Eventos, organizado polo Grupo D. Manuel e Las Mary Poppins, coa colaboración do Concello. O evento, que se desenvolverá nas instalacións do Restaurante Don Manuel, contará con 40 expositores, que amosarán todo tipo de propostas para vodas, bautizos e comuñóns. A mostra estará aberta de 11 a 14 horas, e de 16 a 20 horas.
AS MELLORES IDEAS PARA VODAS, BAUTIZOS E COMUÑÓN
O showroom incluirá stands de organización de eventos, restauración, food truck, floristería, animación infantil, vespas e coches clásicos, música e pirotecnia, ademais de detalles e agasallos para os invitados, e repostería creativa. Os protagonistas dos eventos poderán achegarse ás últimas propostas en traxes de noivo e comuñón, vestido de noiva e de gala, así como solucións en perruquería, lencería, xoiería, tocados ou zapatería.
PASARELA E SORTEO DE BONOS-REGALO
O domingo 3 de decembro haberá unha pasarela, ás 18,00 horas, cun adianto da moda 2018 para traxes de noiva, noivo e gala.
O ShowRoom sorteará entre as parellas asistentes 3 bonos-regalo. Os premios consistirán nunha cea para dúas persoas no restaurante Bistró con aloxamento nunha casa de turismo rural, unha cea Fin de Ano para dúas persoas, e unha cea de Reis para dúas persoas. •

•XVI MOSTRA DE CINE A CALEXA EN MONFORTE

•Últimos días para disfrutar da XVI Mostra de Cine A Calexa en Monforte. O venres 24 de novembro, a partir das 20,30 horas, terá lugar na Casa da Cultura a proxección de “Blade Runner”, de Ridley Scott, na edición especial de 2007.
Xa o luns 27, a partir das 22,30 horas, poderá verse nos Multicines Hollywood a película “Morir”, de Fernando Franco. O martes día 28, á mesma hora, proxectarase o filme “El otro lado de la esperanza”, de Aki Kaurismaki.
A entrada a todas as sesións é de balde.
A XVI Mostra de Cine está organizada polo CineClub A Calexa, en colaboración co Concello de Monforte.•

•O Grupo Teatral de Ribas de Sil actúa en Ferreira o domingo 26

•O Concello de Pantón continúa coa programación cultural do outono. O domingo 26 de novembro, ás 6 da tarde, terá lugar a representación da obra “A herdanza de Xan”, polo Grupo Teatral de Ribas de Sil. Será no Edificio Sociocultural de Ferreira, con entrada de balde.•

•1.600 EUROS EN PREMIOS NO IV CONCURSO DE FOTOGRAFÍA RESERVAS DA BIOSFERA

• R.-MONFORTE.
O tema central desta edición do Concurso, convocado pola Deputación de Lugo, é a harmonía entre persoas e natureza, dentro dos espazos naturais protexidos Terras do Miño e Ancares Lucenses. Os tres mellores traballos serán premiados con 800, 500 e 300 euros, respectivamente. O prazo para entregar os orixinais remata o 30 de novembro.
As bases do IV Concurso de Fotografía Reservas da Biosfera atópanse na páxina web www.deputacionlugo.gal.•

•O SALÓN DE VODAS & EVENTOS VOLTARÁ A SARRIA NO MES DE XANEIRO

• R.- MONFORTE. Sarria será escenario, por terceiro ano consecutivo, da iniciativa Salón Vodas & Eventos, que nesta ocasión terá lugar os días 20 e 21 de xaneiro de 2018. Ante o éxito da pasadas edición, que superou os 2.000 visitantes, a Asociación de Comerciantes e Empresarios de Sarria ofrece unha nova oportunidade para coñecer as mellores solucións coas que celebrar vodas, comuñóns e bautizos. O evento terá lugar nos salóns do Hotel Alfonso IX, e en paralelo desenvolveranse diversas actividades para todos os públicos.•

•Concurso de debuxo infantil sobre Paisaxes Ferroviarios de Monforte

•A Asociación Monfortina de Amigos do Ferrocarril (AMAFER) e o Concello de Monforte organiza, coa colaboración dos centros de ensino da cidade, o Concurso de Debuxo Infantil “Paisaxes Ferroviarios de Monforte”.
Poderán participar escolares de 3º e 4º de Primaria, con debuxos de técnica libre sobre o ferrocarril e a cidade de Monforte.
ATA O 22 DE XANEIRO
Os traballos entregaranse a través dos centros de ensino no Rexistro do Concello, ata o 22 de xaneiro de 2018. Haberá dous premios para cada categoría.
Cos traballos presentados farase unha montaxe audiovisual, que será proxectada durante a entrega de premios na Casa da Cultura, o 19 de febreiro ás 18,00 horas. O audiovisual tamén se verá no mupi da rúa Cardeal, e na web do Concello de Monforte e de AMAFER.•

•Ata o 10 de decembro para participar no Mosaico Patrimonial da provincia de Lugo

•Con motivo do Día Internacional do Patrimonio Mundial, celebrado o 16 de novembro, a Rede Museística de Lugo convoca á cidadanía residente nos 67 concellos da provincia a participar nun gran mural colectivo, para visibilizar a nosa riqueza patrimonial. Os participantes enviarán unha foto na que reflictan como sinten o patrimonio. As fotos remitiranse ao correo pazodetor@museolugo.org, indicando os datos persoais, un breve texto, e a cesión de dereitos da foto. O mosaico amosarase ao público a partir do 18 de decembro•

 

Deja un comentario

Your email address will not be published.

*