UN OUTONO PARA GOZAR DE GALICIA

• As catro provincias combinan gastronomía, enoturismo, balnearios ou cultura para disfrutar dos días máis cortos, semanas nas que ademais é posible navegar polas Rías Baixas a bordo de diversos minicruceiros

A paisaxe fluvial coa súa monumentalidade sorprende ao visitante da Ribeira Sacra.
Na imaxe, vista do Canón do Sil, no municipio de Parada de Sil.
• Despois de ofrecer o mellor de si mesma no verán, Galicia cambia de estación para continuar facendo o que mellor sabe, pois suma máis de mil anos de experiencia: recibir ao visitante. Sempre hai alguén en camiño a Galicia, tamén durante os meses de outono. Porque cando os días se acurtan para que se alonguen as noites, a paisaxe galega vístese de outono. De outono vístense os seus restaurantes e tabernas, os seus vagóns de tren e balnearios, as súas casas de turismo rural, adegas e pazos, os seus  parques naturais, rías e as súas etapas do Camiño de Santiago.

 

Historia, arte e cultura ofrecen ao visitante a oportunidade de achegarse ao pasado romano de Galicia.
Na fotografía, as Termas Romanas de Lugo.
RUTAS XACOBEAS
A proposta outonal de Galicia mostra por que sempre hai razóns para achegarse a ela, sobre todo durante a estación na que algúns dos seus mellores recursos cobran relevancia para formar unha combinación inimitable. Porque só Galicia é meta da peregrinación xacobea, con ata 10 itinerarios diferentes por terra e mar, tres deles declarados Patrimonio Mundial pola Unesco, que posibilitan días ou semanas de intercambio cultural e convivencia.

 

A oferta gastronómica de Galicia inclúe iniciativas como “De tapas por Galicia”, a nova ruta gastronómica polo Camiño Francés, ou o programa “Outono Gastronómico”, que pon en valor o turismo rural e os produtos tradicionais en menús especialmente deseñados para a ocasión.
ENOTURISMO E GASTRONOMÍA GALEGA, UNHA OPCIÓN EN ALZA
Galicia conta con cinco denominacións de origen vitivinícolas como Monterrei, Rías Baixas, Ribeira Sacra, Ribeiro e Valdeorras, marcas que ofrecen percorridos guiados polas súas adegas e viñedos e forman un distinguido conxunto coa súa gastronomía. A habitual oferta culinaria galega de alta calidade  e diversidade, tan prezada polo viaxeiro e que sabe aproveitar os produtos de tempada, pódese disfrutar a través de iniciativas como “De tapas por Galicia”, un certame urbano para saborear as sete cidades galegas, ou no rural, cada fin de semana, con dúas opcións: o programa “Outono Gastronómico”, que cumpre once edicións, con aloxamento en establecementos afastados do ruído con menús ideados para a ocasión, e que en Lugo se pode disfrutar nun total de 20 establecementos, ou a nova ruta gastronómica polo Camino Francés que se estrea este ano.

 

A calidade das súas augas termais sitúa a Galicia como primeira potencia termal de España e segunda de Europa.
Na fotografía, o Balneario de Lugo.
PRIMEIRA POTENCIA EN TERMALISMO, E TURISMO RURAL DE CALIDADE
Case a metade das casas de turismo rural distinguidas coa Q de Calidade en toda España están en Galicia. O mesmo ocorre cos seus balnearios. Galicia é a primeira potencia termal de España e a segunda de Europa, un liderado en cantidade e en excelencia, pois un de cada catro establecementos termais españois con esta certificación son galegos. Este recurso é común a todas as provincias, aínda que destaca de maneira especial Ourense.
MINICRUCEIROS POLAS RÍAS GALEGAS
A Galicia pódese chegar a pé para despois adentrarse nas súas rías, que son tamén navegables nestas semanas, cando é posible percorrelas a bordo dos “Minicruceiros costeiros polas rías de Galicia”. A costa galega, con 1.600 quilómetros, 16 rías, preto de 900 praias de prestixio internacional ou 112 portos, ofrece tamén numerosas posibilidades este outono para practicar deportes como o surf e as regatas, ou mergullarse na cultura mariñeira. •

Deja un comentario

Your email address will not be published.

*