Estrea oficial da Ruta de Sendeirismo da Ribeira Sacra do Miño PR-G 162

Impulsada pola Asociación Veciñal de O Saviñao, acaba de ser homologada

Un tramo de subida na etapa Cima de Atán- Marce, que constitúe unha das catro deste novo itinerario natural do sur de Lugo. (Foto cedida: Asociación Veciñal de O Saviñao).

O pasado 8 de novembro, a Asociación Veciñal de O Saviñao organizou unha camiñata moi especial, para celebrar a recente homologación da ruta de sendeirismo da Ribeira Sacra do Miño, que ven de ser recoñecida pola Federación de Montañismo e Sendeirismo co distintivo PR-G 162 logo dun exhaustivo traballo de varios anos por parte deste colectivo veciñal.

O Miño sempre foi o gran olvidado nos roteiros da Ribeira Sacra, e co impulso e homologación oficial desta nova ruta, a Asociación Veciñal de O Saviñao quere rescatar o protagonismo natural e paisaxístico deste río. (Foto cedida: Asociación Veciñal de O Saviñao).

RUTA RÍO ARRIBA EN CATRO ETAPAS

Esta ruta de ribeira percorre máis de 30 quilómetros entre Sto. Estevo de Ribas de Miño e Sto. Estevo de Atán, nun longo itinerario dividido en catro etapas. Nesta ocasión, o colectivo veciñal propuxo unha ruta á inversa, río arriba, da etapa que vai dende Cima de Atán ata Marce, seis quilómetros de aromas, texturas e colorido por camiños dende os que se vislumbran minas de auga, e que levan ata a igrexa románica de Sto. Estevo de Atán, para subir á aldea abandoada de Reiriz, ver as airas da malla enlousadas antes de Seoane, e introducirse no bosque ribeireño, poboado de sobreiras e madroños, coa ineludible visita á fervenza de Augacaída, logo de atravesar o regato Aguianza. Un paseo natural que xa pode disfrutarse gracias ó traballo e á constancia desta asociación veciñal.

A camiñata organizada pola Asociación Veciñal de O Saviñao aproveita a policromía excepcional que o outono imprime na nosa paisaxe. (Foto cedida: Asociación Veciñal de O Saviñao).

POSTA EN VALOR DUN TERRITORIO EXCEPCIONAL

Cando estes veciños comezaron o deseño deste percorrido, buscaban dotar dunha ruta de sendeirismo ó municipio de O Saviñao, que non tiña ningunha senda homologada, e potenciar o protagonismo do pai Miño, o gran olvidado fronte o Sil nos trazados sendeiristas da Ribeira Sacra. Ademais, trataban así de ampliar a oferta de actividades na natureza nesta zona. «Consideramos que a Ribeira Sacra é rica en vexetación, paisaxe, patrimonio, viticultura e tradicións culturais», explicou Manuel Sarmiento, vicepresidente da Asociación Veciñal de O Saviñao, «e eses son os elementos que temos que ofrecer para atraer visitantes e conseguir ser Patrimonio da Humanidade». No seu haber teñen tamén conseguir a sinalización, limpeza e o acordo entre veciños para ofrecer o acceso ó dolmen de Abuíme, unha das escasas mostras do Neolítico na comarca. Ademais, comezan a ver cumplido o seu obxectivo de promoción da zona: un grupo de 50 sendeiristas de Lugo farán a ruta a mediados deste mes, e os establecementos de hostelería próximos á senda xa notan o movemento de visitantes. «Hai que sumar alternativas e ofertas, sen localismos, co obxectivo común de facer medrar a oferta da Ribeira Sacra».•

Deixa unha resposta

Your email address will not be published.

Nova Anterior

Galicia, a segunda comunidade onde máis se usa a administración electrónica

Seguinte Nova

A Festa da Castaña do Courel, máis festa que nunca

Últimas noticias sobre ASOCIACIONISMO

A %d blogueros les gusta esto: