O futuro do Hospital comarcal de Monforte, a debate

Non se descartan novas mobilizacións en defensa dunha área sanitaria autónoma

O hospital comarcal de Monforte cumpre un cuarto de século dende a súa entrada en funcionamento e non o fai exento da polémica que dende o pasado ano se asentou na zona en canto ao seu futuro. Agardando pola aprobación do decreto específico que converterá en área sanitaria integrada a que comprende a zona sur de Lugo, son moitas as afirmacións que se verten dende distintas frontes políticas e sociais e que apuntan a situacións ben diversas no que se refire á nosa sanidade máis local e ás súas perspectivas. En resposta á entrevista publicada no pasado número do noso periódico e na que a conselleira de Sanidade, Pilar Farjas, afirmaba que a xestión integrada vai significar para a zona sur de Lugo unha área sanitaria mellor equipada e se pronunciaba en contra das liortas políticas ou persoais en torno a este asunto, En Común quixo coñecer a percepción da Plataforma en Defensa da Sanidade Pública e tamén dos responsables políticos da comarca.

PLATAFORMA SANITARIA

En primeiro lugar, o colectivo que promoveu a histórica manifestación que concentrou a centos de persoas na cidade do Cabe en maio de 2010 non está de acordo en que, tal e como afirma a conselleira, nos atopemos “ante unha simple redefinición administrativa”. Para os responsables da plataforma, “a linguaxe que utilizan os representantes do Sergas e a propia Consellería de Sanidade confunde e desvía a atención dos cidadáns usando a táctica da tinta do calamar que só pretende confundir con palabrería, sobre cal é o verdadeiro problema, ou sexa, a perda do significado real do que é unha área sanitaria”, apuntan.

Algúns membros da Plataforma en Defensa da Sanidade Pública da Comarca de Lemos que falaron para En Común PLADESAPU

En referencia ás palabras de Pilar Farjas cando pón como exemplo que Ferrol leva funcionando oito anos como área de xestión integrada e que iso non supuxo máis ca vantaxes para os cidadáns, a Plataforma si coincide “teoricamente”, a pesar de que a Consellería “non ten datos publicados do bo aproveitamento desta xestión”. Sen embargo, denuncian que a titular de Sanidade non explica, pola contra, que Ferrol non perdeu capacidade de xestión nin económica, “ou sexa que se mantivo e segue a manterse como área con toda a capacidade e sen dependencia da Coruña” explican. Nesta liña, os responsables do colectivo en defensa da área sanitaria de Lemos apuntan que son precisamente “estas condicións que se lle respectaron á área de Ferrol as que estamos a reclamar para Monforte”, tal e como lembran que prometera o propio presidente da Xunta, Alberto Núñez Feijóo o pasado 28 de maio de 2010, “onde dixo que seriamos unha área cun xerente con todas as competencias e sen dependencia de Lugo”.

Preguntados polas vantaxes que comportaría o concepto de área sanitaria integrada como xestión horizontal dos distintos niveis de atención, os representantes da PLADESAPU defenden ese modelo, pero reclaman a Xestión Integrada que englobe baixo unha única xestión a atención primaria e a especializada, a saúde pública e os centros socio sanitarios subliñando que “para facer isto non é preciso ter que depender de Lugo senón que se trataría de ter ao fronte da xestión integrada un xerente de área de Monforte e non, tal como se ve nos decretos publicados (en referencia ao ocorrido en O Barco ou Burela), un xerente executivo que non ten outra capacidade que a que lle ordene o xerente de verdade que está ao fronte da estrutura con sede en Lugo” .

Do mesmo xeito, en canto aos inconvenientes que a implantación da área integrada traería consigo, a PLADESAPU mira cara a Lei Xeral de 1986 na que se establecería que “as áreas de saúde (o equivalente ás actuais áreas sanitarias) deben distribuírse de forma desconcentrada, tendo en conta sobre todo a proximidade dos servizos ao usuario, a xestión descentralizada e a participación dos veciños”, concretan. Por outro lado, quixeron remontarse á Lei de Saúde de Galicia de 2008, da que sosteñen que “o único que fai é introducir o concepto de Xestión Integrada dos recursos sanitarios, prestacións e programas sanitarios que as áreas desenvolven dentro do seu ámbito territorial”. Con isto, os voceiros da Plataforma, encabezados por Maribel García, cren que o que estaría agora a facer a Consellería “amparándose nesta lei de Galicia e en concreto no artigo 97”, sería cambiar a actual estrutura organizativa das áreas sanitarias e, «o que é máis importante,todas as funcións e competencias, coa finalidade de facer sete grandes estruturas de xestión integrada” que serían Vigo, Pontevedra, A Coruña, Santiago, Ferrol, Ourense e Lugo, apuntaron. Dende este punto de vista, a plataforma considera que se estaría “eliminando as catro áreas sanitarias cun Hospital Comarcal ao fronte, ou sexa, Salnés, O Barco de Valdeorras, Burela e Monforte de Lemos”.

Os temores da plataforma e dalgunhas frontes sociais e políticas resúmense en que unha vez aplicado este novo sistema de xestión, en Galicia pasariamos de ter once áreas sanitarias a sete. Na opinión do colectivo “de novo queren confundir aos cidadáns dicindo que se mantén o mapa sanitario, transmitindo a mensaxe de que mapa sanitario é o mesmo ca área sanitaria, cousa que non é correcta xa que o mapa só describe a xeografía, e as competencias descríbense dentro da área”. A Plataforma insiste e parece ter claro que o Sergas pretende que área do hospital comarcal de Monforte dependa da “Xerencia Integrada de Lugo, co seu xerente á cabeza”, que sería, desta maneira, quen “propoñería e executaría a reorganización asistencial que se considere necesaria tal como di o artigo 5 do Decreto 168/2010, e por tanto será quen decida que servizos sanitarios se prestarán en Monforte e cales en Lugo”. Este feito “deixaría a porta aberta á posibilidade de perder servizos que na actualidade dispoñemos”, afirman dende a Plataforma.

Nesta situación, as demandas da PLADESAPU céntranse en que “ o presidente da Xunta cumpra o seu compromiso de publicar o Decreto para a provincia de Lugo onde se manteña a capacidade da área sanitaria de Monforte sen dependencia de Lugo”, e con este obxectivo anuncian novas mobilizacións proximamente. Finalmente, vinculan ás súas sospeitas o feito de que se estea a retardar a publicación do devandito decreto e afirman que “todos nos deberiamos preguntar que se esconde para xustificar a tardanza desta publicación, pois se a intención fose boa, o fácil sería darlle luz canto antes para rematar coa confusión”.

OS ALCALDES DAS CABECEIRAS DE COMARCA OPINAN

Esta preocupación é a mesma que traslada o alcalde de Monforte, Severino Rodríguez, en representación do municipio cabeceira da comarca. Para Rodríguez “ todos os indicios van en sentido negativo de cara ao desmantelamento do Hospital”, e cita a contraposición das afirmacións de Núñez Feijóo fronte ás do seu propio grupo parlamentario en referencia á posible dependencia da área sanitaria de Lemos dunha xerencia única provincial, xa que Feijóo comprometera a autonomía do centro hospitalario monfortino. En consonancia coas sospeitas de PLADESAPU, o mandatario monfortino conclúe que “ se estivese clara a independencia da nosa área sanitaria, xa se tería publicado o decreto”. Rodríguez mira cara a amarga experiencia do desmantelamento do ferrocarril na cidade e fai unha comparación co caso do hospital; no que estarían a restarse servizos e postos de traballo dun xeito progresivo e enmascarado, no seu criterio. Por outro lado, o alcalde de Monforte, insta aos responsables autonómicos a recoñecer que non existen recursos económicos no caso de ser a explicación ou a necesidade de encher de contido e actividade a grande infraestrutura sanitaria creada recentemente en Lugo.

Rodríguez traslada que o clima de preocupación está xa dentro do propio hospital comarcal, que está rexistrando por outra parte malos resultados nas listas de espera. “ A lealdade hai que mantela cos cidadáns, e non cos grupos políticos, afirma o mandatario nacionalista”, quen por outra parte fala dun problema que redunda en toda a zona sur de Lugo, non tan só na comarca de Lemos e non tan só no eido estrictamente sanitario, senón tamén económico. “Si se lle quere chamar reaxuste a un feito que esconde recortes económicos na Sanidade, a responsabilidade segue a ser da Xunta”. Os responsables autonómicos, en opinión do alcalde, seguen a “confundir” e a alimentar a preocupación e o malestar cidadán ao non probar o decreto que rexerá a área sanitaria de Lemos. Rodríguez mira cara a mobilización do pasado mes de maio, e apunta que “ a Xunta debe respectar e mirar con responsabilidade o que alí manifestaron masivamente os cidadáns”. Rodríguez fala dunha “cuestión vital” para Monforte e de “consecuencias catastróficas” si se produce o temido “desmantelamento ou desaparición progresiva” do centro hospitalario tal e como é hoxe.

Dende a cabeceira comarcal de Chantada, con dous concellos inmersos na área sanitaria de Lemos, o alcalde, Manuel Varela, recoñece unha certa preocupación e desconfianza por parte da poboación. “Trátase dun servizo exquisito para os nosos veciños- en referencia ao hospital- pola súa proximidade e cobertura, pero é certo que ás veces se fai complicado contar con todos os servizos nas mellores condicións”, apunta. Ao tempo valora como tranquilizadoras as palabras dos responsables do Sergas e do goberno galego, pero desconfía da proximidade electoral neste senso. “Eu non me metería en si a xerencia vai depender ou non de Lugo, porque no ámbito sanitario é complicado contar con todas as especialidades en todos os hospitais, e a idea de fomentar un hospital de referencia a nivel provincial en certas ramas sanitarias, non me parecería mal”, apunta Varela, quen, sen embargo, non comulgaría cos recortes en servizos, aínda que se reorganice a xestión.

Ante novas mobilizacións, Varela postúlase partidario de esgotar as vías de diálogo en primeiro termo, pero non descartaría encabezar protestas “si se demostra que se está a mentir dende o Sergas ou se están a mermar os servizos”.

“Reorganizar os servizos non debería estar mal visto”, resume pola súa banda o rexedor quirogués, representante da cabeceira doutra das comarcas vinculadas á area sanitaria e polo tanto aos servizos hospitalarios de Monforte. Julio Álvarez considera que o descontento actual é unha polémica xerada con facilidade dende certos intereses. Como rexedor e dende a proximidade como traballador sanitario, Álvarez non percibe indicio algún de desmantelamento dos servizos sanitarios na zona “ senón todo o contrario”, apunta. Os futuros cambios vincúlanse a unha “cuestión de reorganización interna, e o único que nos ten que preocupar aos cidadáns é que non se merme a calidade da asistencia sanitaria, o resto é cousa dos xestores e dos políticos, e o que ten que valorar a plataforma é o resultado da xestión e non debe adiantarse aos acontecementos”, apunta o mandatario quirogués, quen engade que “ as denuncias hai que apoialas con datos”. Julio Álvarez aposta por que “ o goberno goberne e non se deixe influír, ao tempo que lanza a idea de que si os obrigados recortes non merman a calidade e cantidade dos servizos, iso significará que se implantará unha boa xestión.

A CORPORACIÓN MONFORTINA VALORA

E dende outros ámbitos como a oposición local, eses cambios percíbense como algo a todas luces innecesario. En palabras do voceiro socialista na corporación monfortina, José Tomé, “si o hospital funciona ben dende hai 25 anos non vemos motivo de cambio no seu organigrama”. O PSOE monfortino postúlase unha vez máis en favor dunha xestión integrada entre a atención primaria e a especializada, “pero sempre que a área sanitaria de Monforte siga tendo a mesma autonomía que ata o momento, cun orzmento propio e con capacidade de decisión para xestionar os seus recursos”, é dicir, cunha liña directa co Sergas en Santiago. Coas mesmas sospeitas que o goberno monfortino e a PLADESAPU, os socialistas apuntan a que o goberno galego vai deixar pasar as eleccións para lanzar o decreto que rexerá a área sanitaria de Lemos, e que temen vaia na mesma liña ca o do Barco, O Salnés e A Mariña. Tomé Roca expresa o desexo de que “ ogallá con Monforte fagan unha excepción, tal e como prometeu Núñez Feijóo”, e colócase novamente a carón do colectivo en defensa da sanidade pública nas súas reivindicacións.

Nembargantes, para Julia Rodríguez, voceira do PP na corporación local de Monforte, o modelo que prantexa a Xunta é un novo modelo “organizativo” e “dirixido a mellorar a atención ao paciente dunha forma máis moderna e eficaz, con maior coordinación, mellora da calidade e tempos de espera ao tempo que permitirá ampliar servizos e especialidades nos hospitais comarcais”. Julia Rodríguez adianta que o novo esquema vai permitir que os pacientes monfortinos teñean acceso aos mellores especialistas do Hospital Lucus Augusti en casos de complexidade e sin a necesidade de desprazarse a Lugo sistemáticamente grazas á mobilidade do persoal, que entende “ fará máis atractivos os hospitais comarcais para os profesionais que desexen desenvolver a súa carreira e isto traerá consigo as dificultades de contratación que que afectan habitualmente aos pequenos hospitais.

En representación do Grupo Municipal do PP, Rodríguez di ter mantido contactos con profesionais e pacientes de hospitais onde se aplicou o novo sistema de xestión, quen lle tería trasladado que “ a atención ao paciente e a organziación do traballo teñen mellorado considerablemente”, apunta. O único inconveniente sería, en opinión dos populares monfortinos, o que podería darse para os profesionais sanitarios derivado desa mobilidade xeográfica, “pero en todo caso como vai ser pactada e voluntaria, non cremos que supoña maiores problemas”, puntualiza Rodríguez Barreira.

Preguntada sobre a polémica e as diversas opinións existentes arredor do futuro do hopsital, a voceira popular considera que “se trata dunha polémica creada co fin de obter unha rendibilidade política”. A alarma social existente é para ela “ creada, inxustificada e desproporcionada e sobre un tema moi sensible” e lembra que nas áreas integradas en funcionamento “ non houbo desmantelamento algún nin perda de servizos” e vai máis aló en relación a opinións como a que verquía o rexedor monfortino; “comparar este cambio organizativo co desmantelamento de Renfe é unha irresponsabilidade e non pode entenderse doutra maneira que non sexa co afán de obter réditos políticos”. Por outra parte, Julia Rodríguez fala de que nin a desaparición nin o desmantelamento progresivo do hospital son denuncias que teñan fundamento algún. Tampouco falta a súa referencia ás eleccións, e indica que “ non nos sorprendería encontrarnos cun novo nuevo repunte da polémica en vísperas de eleccións”; en consoancia co que opinan os alcaldes populares da comarca, apela ao paso do tempo para poñer as cousas no seu lugar.

En maio de 2010 centos de persoas da comarca acudiron á manifestación en defensa do hospital convocadas pola PLADESAPU. Foto: EC

OS ALCALDES DE LEMOS DEFENDEN A PERMANENCIA DE SERVIZOS DE DISTINTA MANEIRA

Para os pequenos concellos da comarca o hospital comarcal é un servizo directo e punto de atención continuada, a súa proximidade é valorada polos rexedores, que como Luís Fernández Guitián, alcalde de Sober, son prudentes á hora de facer valoracións ata que non se produzan os cambios en previsión, e apunta que “ as sospeitas non son sempre realidades”, pero en todo caso posiciónase a favor dunha área integrada propia e en contra duns cambios que poidan producir calquera merma nos servizos.

A mesma sensación de tranquilidade e espera transmite o alcalde do Saviñao, o popular Joaquín González, quen apunta dende unha perspectiva persoal, que “ as informacións que teño non son as mesmas que se difunden dende algúns sectores e que se dirixen cara un desmantelamento do hospital, a Consellería e o propio partido transmiten que non existe nada diso, e mentres non se diga ou demostre o contrario quédome con esas informacións”. González posiciónase en prol da defensa dos servizos do hospital tal e como estivo prantexado deica hoxe “ ou incluso en prol dun incremento dos mesmos” e anuncia que defenderá o hospital en representación dos veciños, pero lembra que non existe temor algún dende o goberno local na dirección de que se vaian tomar medidas que perxudiquen a asistencia hospitalaria na comarca. Tampouco hai desconfianza algunha ou temor a un recorte de servizos por parte do mandatario local de Pantón, José Luís Álvarez, quen afirmou que “algún alcalde dixo que se ía pechar o Hospital, e ata esta data non se percibiu aínda tal síntoma no centro sanitario en ningún sentido”. Álvarez ampárase na palabra dada pola conselleira de Sanidade e o presidente da Xunta e tamén rexeita adiantarse aos acontecementos indicando que “ antes de que nada ocorrera a Plataforma en Defensa da Sanidade Pública pretendeu facer ruido con fins políticos”. Por outra parte susténtase en que á área sanitaria de Lemos é un territorio considerable para que pase a depender dunha xestión emprazada en Lugo, e en relación á espera pola aprobación do decreto, considera que os tempos nas administracións son lentos e deben cumplirse certas burocracias.

Pero a espera pola saída a luz deste decreto non tería a mesma base burocrática en opinión do alcalde de Ribas do Sil, o socialista Miguel Ángel Sotuela, quen desconfía das promesas de Núñez Feijóo “ata que non se rexistren por escrito”. Declara que “ se non había problemas nin nada que ocultar, o decreto debería estar aprobado xa”. Sotuela maniféstase na mesma liña que cada un dos alcaldes da comarca de “manternos unidos cos veciños nas súas reivindicacións” e non descarta encabezar novas mobilizacións no caso de seren convocadas polas plataforma. Sotuela detecta continuos recortes na asistencia sanitaria da comarca e só ve que se poidan evitar cunha área integrada independente e autoxestionada.

Na mesma desconfianza e temor ao futuro do hospital se pronuncia o rexedor da Pobra do Brollón, José Luis Maceda. O nacionalista afirma que xa se están a producir mermas nos servizos “ aínda antes de saír o decreto”, e isto reflectiríase, sen ir máis lonxe, en datos coma o incremento das listas de espera “ e non o digo eu, que o din os pacientes”, sentenza Maceda. “Depois de case un ano das declaracións do presindente do Goberno Galego, seguimos pendentes da aprobación dese decreto, e os cidadáns van perdendo a confianza nas súas palabras”, engade o alcalde, quen considera que a Plataforma en defensa da Sanidade é un colectivo totalmente “plural e cívico, moi lonxe dos que queren velo como un instrumento político, e iso quedou demostrado coa contundente resposta que tivo a manifestación cidadá de maio de 2010”, subliñou.

Dende Bóveda, o goberno local amósase preocupado “ unicamente por que se garanta a atención que os veciños tiveron ata agora e que se traballe incluso por mellorala”, di o alcalde José Manuel Arias, que confía no mantemento dos servizos hospitalarios no futuro. Nunha postura similar á do mandatario quirogués, o popular amósase á marxe dos cambios de xestión que poidan producirse e non entra a valorar o novo modelo organizativo, “ que pode que redunde en beneficio dos usuarios, e polo momento tampouco se están rexistrando problemas”, engade. Arias confésase descoñecedor dos sistemas de xestión sanitaria, pero opina que as intencións dos cambios van enfocadas a fomentar melloras, a pesar de que non ve con bos ollos “ que se produciran recortes nunha sanidade pública da que temos a sorte de presumir”, conclúe.

Deixa unha resposta

Your email address will not be published.

Nova Anterior

Conservatorio Adagio de Monforte: vinte anos de música clásica profesional, vinte anos de ilusión

Seguinte Nova

Formación en A Pobra do Brollón

Últimas noticias sobre GALERÍA

A %d blogueros les gusta esto: