O Xeolodía lucense celebrarase en maio nas Montañas do Courel

•O Xeolodía, que se celebrará o domingo 10 de maio de xeito simultáneo en todas as provincias, é a maior actividade científica ao aire libre de España •En 2019, a cita divulgativa reuniu no conxunto do Estado a máis de 8.500 persoas, guiadas por 600 xeólogos •A excursión lucense ofrece 90 prazas de balde, previa inscrición

Imaxe de arquivo dunha xornada do Xeolodía, celebrada na contorna de Quiroga. (Foto cedida).

O Xeoparque Montañas do Courel será o escenario ao aire libre da vindeira cita do Xeolodía, unha excursión lúdico-científica que se celebrará de xeito simultáneo en todas as provincias de España o domingo 10 de maio. O itinerario percorrerá a xeoloxía do contorno de A Seara e Vieros.

15 ANOS DIVULGANDO A XEOLOXÍA
A iniciativa, que ten como obxectivo dar a coñecer a xeoloxía e o seu campo de estudo, foi impulsada hai 15 anos pola Sociedad Geológica de España e a Asociación Española para la Enseñanza de las Ciencias de la Tierra. O ano pasado, participaron a nivel nacional máis de 8.500 persoas, guiadas por 600 xeólogos, na que constitúe a maior actividade científica ao aire libre de España.

SAÍDA E REGRESO EN AUTOBÚS DENDE QUIROGA
O Xeolodía da provincia de Lugo está deseñado como unha excursión de 8 horas de duración por diversos enclaves do Xeoparque Montañas do Courel. Segundo informaron dende a organización, o punto de encontro será diante do Museo Etnográfico de Quiroga, entre as 8:30 e as 9:00 horas, momento no que está prevista a saída dos autobuses cara á aldea da Seara. O regreso tamén se fará en autobús, que devolverá aos participantes ao mesmo punto de Quiroga, entre as 17 e as 18 horas.

EQUIPAMENTO
A organización recomenda levar botas de montaña, chubasqueiro, roupa de abrigo e gorra para o sol. É obrigatorio que cada viaxeiro leve a súa comida e botella de auga.
A excursión inclúe unha camiñata a pé de 3,6 quilómetros de lonxitude e 80 metros de desnivel. Os participantes repartiranse en grupos de 15 a 20 persoas, con cadanseu guía especializado.

ITINERARIO
A primeira parada será no Xeomirador de A Golada, coas vistas ao valle glaciar de A Seara. Na segunda parada, farase unha aproximación explicada do depósito glacial deste contorno, e na terceira, os visitantes poderán afondar nas características das rocas tradicionais, algunha delas locais e outras aportadas polos glaciares.
Na seguinte parada, visitarase a cascada de Vieiros, formada no encaixamento do río Selmo e o levantamento das Montañas do Courel. Para rematar, a derradeira etapa centrarase no muíño de auga de Vieiros, que aproveita o potencial hidráulico xerado polo encaixamento dos ríos.
A excursión é gratuíta, previa inscrición, antes das 13 horas do 8 de maio, no enderezo info@ribeirasacracourel.es, indicando nome, DNI, lugar de procedencia e número de teléfono. Concederanse as 90 prazas por orde de inscrición.•

Deixa unha resposta

Your email address will not be published.

Nova Anterior

A Xunta presentou aos autónomos lucenses as novas axudas para a segunda oportunidade e o traslado xeracional

Seguinte Nova

Distribuidores e produtores impulsan o leite galego

Últimas noticias sobre ASOCIACIONISMO

A %d blogueros les gusta esto: