•Ademais de loitar contra o abandono dos inmobles, o texto normativo busca a potenciación do patrimonio e a dinamización económica e demográfica
Galicia poderá xestionar de forma máis eficaz a conservación do seu patrimonio inmobiliario a partir do 22 de maio. Ese día, entrará en vigor a Lei de Rehabilitación, a primeira deste tipo en Galicia, e que busca non só preservar o bo estado dos edificios históricos, senón dar un pulo global á comunidade, «avanzando cara unha Galicia máis atractiva para vivir, traballar e visitar», segundo precisaron dende a Xunta.
NÚCLEOS RURAIS E CENTROS HISTÓRICOS
De xeito prioritario, o Goberno galego pretende que a nova lei axilice os trámites para recuperar os centros históricos e os núcleos rurais. Dende o Executivo autonómico entenden que «non hai maior desprotección dunha edificación que o abandono ou desuso», polo que se vai incentivar a cultura da rehabilitación.
MÁIS LICENZAS DIRECTAS E SANCIÓNS ÁS PINTADAS
O novo texto legal permitirá conceder licenza directa á rehabilitación de inmobles nos Camiños de Santiago, e amplía os supostos de concesión de licenzas directas polos concellos para, por exemplo, cambios de cuberta ou accións en fachadas.
A normativa incorpora un réxime sancionador para actuar contra pintadas e grafitis en edificios históricos e ámbitos protexidos.•