As rúas de Monforte estarán decoradas coas luces de Nadal dende o 5 de decembro ata o 6 de xaneiro, con máis presenza e novos deseños lumínicos. Así o adiantou o alcalde, José Tomé, a mediados de novembro, salientando que o Concello vén de incrementar o orzamento para a decoración destas festas navideñas, e introducirá varias novidades respecto aos últimos anos.
UNHA ESTRELA DE GRAN TAMAÑO NA PRAZA DE ESPAÑA
En total, serán 53 as rúas monfortinas que contarán con alumeado de Nadal, para o que se van instalar 117 arcos de luz. Así mesmo, vanse decorar a Torre da Homenaxe e as Prazas de España, Carude e Os Chaos, ademais do Campo de San Antonio e a Praza da Estación.
Pola súa banda, colocarase un abeto na Praza da Compañía, e sete letreiros luminosos co lema «Bo Nadal» nas correspondentes entradas á cidade. Como gran novidade, Tomé anunciou que a tradicional árbore lumínica da Praza de España será substituída por unha estrela de grandes dimensións.
En canto ao incremento orzamentario para as luces do Nadal, estimado nun 6% respecto a 2017, Tomé cualificouno de «investimento». O alcalde precisou que o feito de ter as rúas máis decoradas e iluminadas «é moi útil para o comercio e o conxunto da economía», xa que busca «fomentar que as compras destas datas tan especiais se realicen na nosa cidade». Aínda que o Goberno local ten como compromiso levar as luces do Nadal «a todas as zonas do municipio», as rúas comerciais terán máis arcos de luz. A partida municipal para as luces de Nadal é de 18.000 euros.•
