•O conselleiro de Economía asistiu á entrega de premios, e agradeceu á asociación esta iniciativa que premia o emprendemento

• O 17 de marzo, tivo lugar no Parador de Monforte a entrega dos premios aos mellores proxectos de emprendemento que convoca, dende hai catro anos, a Asociación Semente de Monforte. Dos dez finalistas, o proxecto monfortino Terras de María Castaña, para a produción e comercialización de produtos ecolóxicos da terra, alzouse co primeiro premio de 10.000 euros. O segundo, cunha dotación de 6.000 euros, recaeu no proxecto ourensán La Florida-Innovando con miel, que ten como obxectivo producir e comercializar derivados do mel.
Na entrega de premios estivo presente o conselleiro de Economía, Emprego e Industria, Francisco Conde, que felicitou á decena de finalistas polo seu “traballo, ilusión e valentía”, poñendo en valor “o talento, iniciativa e capacidade de innovar e competir que ten a comarca”.
Conde tamén tivo palabras de recoñecemento para a Asociación Semente de Monforte por esta iniciativa, coa que busca dinamizar o tecido empresarial desta contorna.•