Crónica del sur de Lugo

A Deputación acondicionará 18 quilómetros de viais en 5 concellos do sur

•En total, o organismo provincial aprobou en dúas semanas 6,2 millóns de euros para obras en 45 estradas de 25 municipios

•O organismo provincial deu luz verde a novos traballos de mellora en estradas de Taboada, Monforte de Lemos, Sarria, Ribas de Sil e O Incio

Rolda de prensa do presidente da Deputación, Darío Campos, para explicar os últimos investimentos en obras viarias, a finais de xaneiro. GPDL
• O arranxo nas estradas provinciais vén de recibir un novo impulso o mes pasado, coa aprobación, en 15 días, de obras por importe de 6,2 millóns de euros. O detalle das actuacións, que abranguen 124 quilómetros en 45 viais ao longo de 25 concellos, foi explicado en rolda de prensa polo presidente da Deputación, Darío Campos Conde, a finais de xaneiro.
1 MILLÓN PARA ARRANXAR O FIRME DE 21 QUILÓMETROS EN 6 CONCELLOS
O mandatario provincial precisou que na última Xunta de Goberno do mes pasado, aprobouse destinar 1 millón de euros para acondicionar con aglomerado en quente o firme de 21 quilómetros de 11 viais, ao seu paso polos municipios de Taboada, Monforte, Riotorto, Foz, Pedrafita do Cebreiro e Guntín. Ademais, os proxectos inclúen a renovación dos sinais horizontais e verticais, para incrementar a seguridade viaria.
5,2 MILLÓNS PARA OUTROS 103 QUILÓMETROS
Con anterioridade, a Deputación viña de aprobar un investimento de 5,2 millóns de euros para acondicionar outros 103 quilómetros, pertencentes a 34 estradas de 19 concellos. “Somos a institución que máis inviste en obra pública na nosa provincia”, salientou Campos Conde.
OBRAS EN TABOADA E MONFORTE DE LEMOS
No sur lucense, serán algo máis de 18 quilómetros de firme os que se van acondicionar con estes investimentos. Os tramos corresponden a un total de 10 estradas, ao seu paso por Taboada, Monforte de Lemos, Sarria, O Incio e Ribas de Sil. O presidente provincial precisou o alcance de cada dunha destas actuacións.
Así, no municipio de Taboada, aprobouse acondicionar 3,2 quilómetros nas estradas LU-P-6001, de Taboada, por Adá á LU-213; LU-P-6004, do Alto de San Xulián a Castelo; e LU-P-6005, de Taboada a Adá, a Almuíña.
No caso de Monforte de Lemos, as obras mellorarán o firme de 3,2 quilómetros nos viais LU-P-3201  de Monforte a Sober; LU-P-3205 de Monforte a Reboredo, e LU-P-3203 de Monforte a Rozabales.
ACONDICIONAMENTO DO FIRME EN TRAMOS  PROVINCIAIS DE RIBAS DE SIL, SARRIA E O INCIO
No municipio de Ribas de Sil, a Deputación arranxará un total de 5 quilómetros da estrada LU-P-5302 de San Clodio a Casares.
Así mesmo, no concello de Sarria, as obras provinciais abranguerán o arranxo de 3,6 quilómetros no vial LU-P-5602 de Samos por Pintín a Sarria.
Outra das actuacións na rede viaria do sur lucense corresponde ao término municipal do Incio, no que se acondicionarán 3,6 quilómetros en dúas estradas, na LU-P-2503, do Incio por Vilarxoan á LU-P-5603 e  LU-P-2506, e na LU-P-5711 en Saa por Balbón a Pacios.
As partidas aprobadas en xaneiro polo organismo provincial inclúen obras en estradas que discurren por Foz, Riotorto, Guntín, Pedrafita do Cebreiro, Barreiros, Baralla, A Pontenova, Becerreá, Castroverde, Lourenzá, Meira, Ribeira de Piquín, A Fonsagrada, Guitiriz, Navia de Suarna, Trabada, O Valadouro, Viveiro, Cervantes e A Pastoriza.•

Deja un comentario

Your email address will not be published.

*

Últimas noticias sobre GALERÍA

Ir a Inicio