Crónica del sur de Lugo

Educación abrirá en setembro unha sección de Inglés da Escola de Idiomas en Chantada

O IES Lama das Quendas será a sede en Chantada da nova sección de Inglés da Escola Oficial de Idiomas. Arquivo EC
• Chantada contará cunha nova oferta educativa dende setembro. O 1 de xullo, a Consellería de Educación anunciou que no curso 2017-2018 entrará en funcionamento unha sección de Inglés da Escola Oficial de Idiomas, que ofrece inicialmente un total de 90 prazas para tres grupos, un de nivel básico (A1) e dous de nivel intermedio (B1). A previsión da Consellería é ir implantando de xeito progresivo os restantes niveis nos vindeiros cursos.
A MATRÍCULA SERÁ NA ESCOLA DE IDIOMAS DE MONFORTE
Segundo explicaron dende a Consellería, as clases de Inglés impartiranse nas instalacións do IES Lama das Quendas, aínda que a matrícula deberá formalizarse na Escola Oficial de Idiomas de Monforte, centro ao que está adscrita a nova sección. A preinscrición realizarase on line no mes de xullo, e a matrícula se formalizará en setembro.
RESPONDER Á DEMANDA DA POBOACIÓN E COMPLETAR A FORMACIÓN DOS CICLOS
Os responsables da Consellería de Educación precisaron que a apertura desta sección de Inglés en Chantada busca atender a demanda da poboación interesada na aprendizaxe de idiomas, tanto do propio municipio como da súa comarca. Ademais, a nova sección dará resposta, segundo precisaron dende Educación, ás necesidades de cualificación do alumnado que cursa ciclos formativos, sobre todo o de FP Dual, dado o seu perfil empresarial e competitivo.
Ao mesmo tempo que a de Chantada, a Consellería anunciou a apertura dunha sección en Melide, co que suma un total de 28 en toda Galicia, dependentes das 11 Escolas Oficiais de Idiomas.•
Tags:

Deja un comentario

Your email address will not be published.

*

Últimas noticias sobre EDUCACION

Ir a Inicio