Anthony Swift, fundador de The Wine Pleasures

Enoturismo na Ribeira Sacra: “A clave do sector está en vender o territorio, e as paisaxes desta zona son espectaculares”

Redacción-Monforte

Inauguración do Congreso por parte de María Xosé Vega, Eduardo Díez e Severino Rodríguez. EC

Os pasados 4, 5 e 6 de maio celebrouse en Monforte de Lemos o IX Congreso de Museos do Viño de España; un evento que levou por título “Crecer en tiempos de crisis” e que estivo organizado polo Concello de Monforte de Lemos, a Deputación de Lugo (Área de Turismo) e a Aasociación de Museos do Viño de España. Foron precisamente o Alcalde da cidade, Severino Rodríguez, a Vicepresidenta terceira da Deputación, María Xosé Vega Buján, e o Presidente da Asociación de Museos do Viño de España, Eduardo Díez, os encargados da inauguración. É de destacar que nada máis comezar Díez sinalou sentirse “conquistado polas paisaxes da Ribeira Sacra”. Pola súa parte, Anthony Swift, de nacionalidade británica e fundador e xerente de Wine Pleasures, unha das empresas pioneiras en viaxes de viño en España, foi o encargado de dar a primeira conferencia.

Anthony Swift abreu a ronda de conferencias do Congreso de Museos do Viño de España celebrado en Monforte. EC.

É o viño un turismo especial?

Rentable polo menos sí que é. Polo tanto, todo o conxunto de oferta enoturística que ten a Ribeira Sacra xa debería gustar de por sí, porque é rentable. E nese conxunto atópanse compoñentes como as adegas, que son as estrelas do produto; os hoteis, campings se os hai, restaurantes, e todas aquelas empresas que oferten o que eu chamaría servizos complementarios.

Cre que o enoturismo está o suficientemente explotado nesta zona?

Bueno, fai dous días descoñecía esta zona, e isto quere dicir que o territorio, se eu que me considero do sector e coñezo moitos lugares do mundo con ofertas enoturísticas a través de medios como as redes sociais, que é onde eu máis miro, pois se ainda así non o coñecía, significa que non está o suficientemente dado a coñecer. De feito, en Google hai poucas entradas sobre este lugar como destino enoturístico.

Afecta a crise ao sector enoturístico?

Para o enoturismo eu diría que non hai crise. O enoturista, falo de enoturistas estranxeiros, soe ter unha idade de entre 40 e 54 anos, soe facer as viaxes con parella e ten estudos altos e ingresos altos, polo que a este perfil de persoa, se hai crise no seu país non lle afecta tal e como lle pode afectar a outro traballador.

Que aporta a celebración deste congreso a Monforte?

Aos asistentes ao congreso o que fai é ensinarlles os rincóns deste lugar. Por exemplo, no noso caso nós temos un blog moi activo no que case ao momento publicamos todo o que facemos, así que ensinamos e difundimos este destino a outras partes do mundo. E despois coa miña conferencia o que tratei de aportar foi como captar máis enoturistas de forma gratuíta, que é a través das redes sociais, explotando o seu uso xa que nelas non hai competencia, todo o mundo o pode facer. Por outra parte, á cidade en sí ou aos veciños, eu diría que o congreso non lles aporta nada, porque a xente do pobo non pode asistir. E bueno, creo que os efectos do congreso se van a ver dende fóra, non dende dentro da poboación.

Visitaron o Centro do Viño. Que opinión lle merece?

A vantaxe que ten é que coa visita ao centro do viño véndese o territorio. Este centro está ben plantexado porque vai a fomentar o enoturismo na zona. Non sei que perfil de visitantes ten, nacionais ou estranxeiros, pero da igual porque co tempo fomentará máis visitas seguro. E o plantexamento é ese, vender viño tamén, pero sobre todo vender territorio que é do que se trata; por exemplo, como chegar ás adegas, onde aloxarse, que ver, etc.

Na súa opinión como experto cales son as claves para o éxito do enoturismo?

A clave do éxito é primeiro vender o territorio, e neste caso o territorio é Galicia. Pero en iso ainda hai moito que mellorar porque por exemplo, se buscas en Google a palabra enoturismo en Galicia, non hai absolutamente nada. E despois dende logo, explotar as redes sociais.

Ten a Ribeira Sacra algún rasgo singular para o enoturismo?

As ‘terrazas’ (bancais), sen dúbida. Eu coñezo o Douro en Portugal e é impresionante, pero isto impresiona moito máis. O problema é que creo que a xente de fóra non sabe que existe. Pero é impresionante, tanto a parte do Miño como a do Sil.

Non coñecía a Ribeira Sacra. E os seus viños?

É certo, descoñecía a Ribeira Sacra, estas paisaxes, os viñedos, pero xa digo, son incluso máis espectaculares que as do río Douro. Tamén descoñecía que se traballaran as variedades Mencía e Godello. O Godello é un viño afrutado, con boa acidez, seco, fresco e mineral. En canto ao Mencía só probei un e non é o meu estilo de viño para unha comida, pero seguro que conta con gran mercado. E probei un Albariño, con corpo, e sí, tamén me gustou.

1 Comment

Deixa unha resposta

Your email address will not be published.

Nova Anterior

Máis de 100 subvencións para pequenas obras en colectivos veciñais do medio rural lucense

Seguinte Nova

Lois Pereiro, unha obra inseparable do destino vital

Últimas noticias sobre CULTURA

A %d blogueros les gusta esto: